Isakhiwo Samahlaya Nokunothisa Kwawo Ulimi Lwesizulu
Loading...
Date
2021
Authors
Journal Title
Journal ISSN
Volume Title
Publisher
Abstract
Lolu cwaningo luhlola isakhiwo samahlaya nokunothisa kwawo ulimi lwesiZulu. Kuzobhekwa indlela amahlaya akheke ngayo, izimpawu zolimi namasu asetshenziswayo ekwethulweni kwamahlaya. Lo msebenzi uzobheka kakhulu isakhiwo sangaphakathi samahlaya. Lo mqingo ufisa ukuphenya ngomthelela amahlaya aba nawo ekuthuthukeni kolimi. Lokhu kuzovela ngaphansi kwezindlela ezisetshenziswa osomahlaya ukwethula umsebenzi wabo, izimpawu zolimi, okuyikhona okuvamayo emahlayeni. Ulimi alukwazi ukungathinteki kulesi sihloko, amahlaya ethulwa ngolimi oluthile. Isahluko sokuqala: Isethulo socwaningo Isahluko sokuqala siqukethe isingeniso noma isethulo socwaningo, ukuchazwa kwamahlaya, izinhloso zocwaningo, inkuthazo yocwaningo, izindlela zokuqhuba ucwaningo, izinsizakuhlaziya, uhlaka lwangaphakathi lwamahlaya, umklamo wocwaningo, imibono yongoti, nokubaluleka nobumqoka bocwaningo. Isahluko sesibili: Ukubuyekezwa kwemibhalo ngezifengqo, amahlaya nomsebenzi wawo. Bathini ongoti ngezifengqo emahlayeni? Baphawula bathini ngamahlaya? Bathini ngesakhiwo sawo? Ithini imicabango yabo? Kuthini ukugalela kwabo ngomsebenzi wamahlaya emhlabeni wonke jikelele? Isahluko sesithathu: Uhlaka Iwezinsizakuhlaziya Isahluko sesithathu siphethe izinsizakuhlaziya nezindlela zokwenza ucwaningo ezizosetshenziswa umcwaningi ocwaningweni lakhe. Ucwaningo luzosebenzisa insizakuhlaziya yokungavumelani, eyobutha, eyokukhulula, ejwayelekile yamahlaya ethulwa ngomlomo. Lezi nsizakuhlaziya izona ezizobamba elikhulu iqhaza ekuhlaziyeni amahlaya anhlobonhlobo athulwe ngezindlela ezahlukene. Kuzobhekwa ukuthuthuka kwamahlaya nesakhiwo sawo. v Isahluko sesine: Isakhiwo samahlaya Kuzobhekwa izizinda zamahlaya, isakhiwo samahlaya nolimi lwawo, ukweyisa, ukudlalisa amagama, ihaba, umbhuqo nombhinqo. Kuvezwa ulwazi ngesu lemidwebo ukucacisa izihlaziyo nokuqhubeka ocwaningweni. Isahluko sesihlanu: Izimpawu zolimi zokwethula ihlaya Ukuhlaziywa kwezimpawu zolimi okuyimpinda, iziphumuzo (ezinde nezimfushane), amagama okuhlela inkulumo, nokuguquguquka kwephimbo. Konke lokhu kuzobhekwa ukuthi kuletha ini entuthukweni yolimi lwesiZulu. Isahluko sesithupha: Isihlaziyo, iziphakamiso nesiphetho Ukuhlaziywa komsebenzi wonke, kubekwe iziphakamiso lapho kudingeka khona bese kwephethwa ucwaningo. Kulesi sahluko kukhona isingeniso, ukubuyekezwa kwemibuzo, izimpendulo zemibuzo yocwaningo, isihlaziyo socwaningo, iziphakamiso nesiphetho socwaningo.
Description
Lwethulelwa Ukuphelelisa Izidingo ZeMasters in Isizulu Emnyangweni Wezilimi Zomdabu Namasiko Enyuvesi Yakwazulu.